Tug Tub kws Poob Zoo Lawm

    Yesxus has ib zaaj lug pevtxwv tas, "muaj ib tug txivneej muaj ob tug tub. Tug tub yau has rua leej txiv tas, 'Txiv, thov koj muab koj lub cuabtaam cov kws yog kuv feem faib rua kuv.'  Leej txiv txawm muab tej cuab taam kws yog nwg tug faib rua nwg ob tug tub.  Tau ob peb nub tom qaab, tug tub yau muab tej kws yog nwg tug muag tau nyaj, ces nwg txawm tsiv moog rua lwm lub tebchaws dlebx lawm, nwg tsi txuag nwg tej nyaj, nwg ywj sab siv ua dloog ua dlig, nwg muab nwg tej nyaj phob taag lawm, thaus ntawd muaj kev tshaib plaab thoob plawg lub tebchaws, nwg tsi tshuav dlaabtsi le lawm. Nwg txhaj moog nrug ib tug txiv neej huv lub nroog ntawd nyob, tug ntawd khaiv nwg moog zuv npua tom teb.  Nwg xaav noj cov npua qhauv kws npuas noj kuas tsau, tabsis tsis muaj leejtwg pub ib yaam dlaabtsi rua nwg noj le.

     Thaus nwg ncu dlheev txug has tas, 'kuv txiv cov tub zug muaj noj muaj haus tsi taag, ua le caag kuv yuav tuaj yoo tshaib ntawm nuav? Kuv yuav rov moog cuag kuv txiv hab has tas, "Txiv, kuv tau ua txhum rua lub ntuj hab ua txhum rua koj lawm.  Kuv tsi tsimnyog ua koj tug tub lawm; thov koj suav kuv ib yaam le kuv yog koj ib tug tub zug xwb.' Ces nwg txawm sawv kev tseeg taug kev rov moog cuag nwg txiv.

     Thaus nwg lug tsi tau txug tseem nyob hov dleb, nwg txiv pum nwg hab hlub nwg kawg le; nwg txiv dlha loo moog puag nkaus tug tub nwj.  Tug tub has rua leej txiv has tas, 'Txiv, kuv ua txhum rua lub ntuj hab ua txhum rua koj lawm. Kuv tsi tsimnyog ua koj tug tub ntxiv lawm lauj!' Tabsis leej txiv has rua cov tubkhais has tas, "Mej kawg kag nqaa cev rig tsho kws zoox tua rua nwg naav. Nqaa nplhaib tuaj rua nwg coj, muab khau tuaj rua nwg rau.  Hab moog muab tug mivnyuas nyuj kws rogx coj lug tua ua ib rooj mov rua suavdlawg noj ua kev zoo sab.  Rua qhov kuv tug tub nuav tub tuag lawm, tabsis nwgnuav nwg caj rov lug lawm; nwg tub pluj lawm, tabsis nwgnuav nrhav tau lawm.' Ces suavdlawg txawm noj haus zoo sab.

     Zaaj lug pev txwv nuav lub tseem ntsab yog qha rua peb has tas, thaum tug tub nuav txomnyem txaus lawm, nwg ncu txug nwg txiv tug kws hlub nwg hab nwg sawv kev tseeg rov lug cuag nwg txiv dlua.  Yog tug tub nuav tsi thim xaav tsi tig rov qaab lug tsev tes zaaj lug pev txwv nuav yuav tsi muaj kev zoo sab (happy ending) thaum kawg. Tabsis vim nwg rov lug tsev, suavdlawg txha le ua kev lom zem zoo sab heev.  Muaj coob leej ntau tug cov hluas tam nuav txawm yog puab nam hab txiv hlub puab npaum le caag los xij, tabsi puab tsi tsaag hab tsi pum txug puab nam hab txiv txuj kev hlub puab le, puab tsi rov qaab lug tsev le.  Qhov nuav yog ib qho tu sab heev.

     Zaaj nuav qha rua peb paub has tas peb tuabneeg nplajteb zoo nkaus le tug tub kws lojleeb nuav ntaag.  Vaajtswv naj nub tog rawv saib puas muaj ib nub peb tso peb tej kev txhum tseg es tig rov lug cuag nwg ib yaam le tug tub nuav.  Tug tub nuav thaum nwg ncu dlheev txug nwg txiv, nwg sawv kev tseeg rov lug moog tsev. 

     Yog tas koj tseem yog ib tug kws tsi tau ntseeg, losis tsi tau paub tas Vaajtswv t hlub koj.  Nub nua kuv qha rua koj tas Vaajtswv nwg hlub koj kawg nkaus le, nwg naj nub tog ntsoov saib nub twg koj lug txais yuav nwg lug ua koj tug Tswv.  Yog koj tso koj tej kev txhum tseg hab thov nwg zaam koj lub txim. Nwg yuav zoo sab kawg nkaus le ib yaam le tug tub kws tau rov lug tsev hov ntaag.  Cov kws rov lug cuag peb leej txiv Vaajtswv lawm tes yog kag le kws tug tub lojleeb nuav leej txiv has ntaag. Puab twb tuag lawm tabsis caj rov lug lawm, poob zoo lawm tabsis ho rov ntshav tau lawm.

     Txhob tog ntev, Vaajtswv tseem naj nub tog koj, lub sijhawm tseem tsi tau hli. Ca le tig hlo lug cuag Vaajtswv tug kws hlub koj.  Yog koj txais yuav tswv Yesxus lug nyob huv koj lub sab, tes koj zoo ib yaam le tug tub lojleeb, koj twb tig rov lug cuag leejtxiv lawm ntaag. 

     Yog koj has cov lug le nuav huv koj lub sab tuaj tag tag rua Tswv Yesxus. Vaajtswv yuav zoo sab hlo txais yuav koj ib yaam nkaus.  "Tswv Yesxus, kuv yog tuabneeg txhum, nub nua kuv thov koj zaam kuv lub txim.  Thov koj lug nyob huv kuv lub sab hab ua kuv tug Tswv txij lub sijhawm nuav moog Amees."

     Yog koj has cov lug nuav taag lawm, hu nrug ib tug xibfwb kws nyob huv koj lub zog thaam hab moog koom pawg ntseeg. Xibfwb zoo sab yuav paab kuas koj paub zaaj nuav tseeb dlua qhov qub.

Koj nev! Lub tseem ntsab ntawm zaaj lug pev txwv nuav yog le caag rua koj?

Nyeem ntxiv moog rau Phau Tshaaj Moo Zoo: Yesxus Lub Neej